Պաշտպանական գերատեսչության ղեկավարին ուղեկցել են ՀՀ ԶՈՒ գլխավոր շտաբի պետի առաջին տեղակալ, գեներալ-լեյտենանտ Էնրիկո Ապրիամովը, ՀՀ ՊՆ աշխատակազմի ղեկավար Գառնիկ Հայրապետյանը, ՀՀ ԶՈՒ ռազմաբժշկական վարչության պետ, գնդապետ Կամավոր Խաչատրյանը: Հոսպիտալ կատարած այցի ընթացքում Սեյրան Օհանյանը զրուցել է հոսպիտալում բուժվող զինծառայողների հետ, հետաքրքրվել նրանց բուժման ընթացքով և մաղթել շուտափույթ ապաքինում: Հոսպիտալում էին նաև այն զինծառայողների ծնողները, որոնց զավակները վերջին շրջանում ստացել էին տարբեր աստիճանի վնասվածքներ և հոսպիտալի բուժանձնակազմի ջանքերով բարեհաջող բուժումից հետո ամբողջությամբ վերականգնվել են: Ողջունելով հավաքվածներին, Սեյրան Օհանյանը նշել է, որ զինվորների հարազատներն իր խնդրանքով են եկել հոսպիտալ, որպեսզի միասին շնորհակալություն հայտնեն բուժծառայության անձնակազմին՝ վիրավոր և հիվանդ զինծառայողներին ցուցաբերած բուժօգնության, ծառայության նկատմամբ դրսևորած բարեխիղճ վերաբերմունքի, մասնագիտական բարձր որակների և լարված իրավիճակներում զինվորականների կյանքը հրաշքով փրկելու համար: Հոսպիտալում անցկացվել է նաև աշխատանքային խորհրդակցություն, որի ընթացքում տրվել են համապատասխան ցուցումներ և հանձնարարականներ: Այցելության շրջանակում պաշտպանության նախարարը Կենտրոնական կլինիկական զինվորական հոսպիտալի մի շարք բուժծառայողների խրախուսել է գերատեսչական մեդալներով և պատվոգրերով: