Ողջույնի խոսքով հանդես է եկել ՀՀ ՊՆ տեղեկատվության և հասարակայնության հետ կապերի վարչության պետ Վարդան Ավետիսյանը, այնուհետև` «Հայոց արծիվների» ղեկավար Խաչիկ Ասրյանը: Իր խոսքում Խ. Ասրյանը ներկայացրել է անցած չորս տարիների ընթացքում կազմակերպության իրականացրած գործունեությունը, նշել, որ «Հայոց արծիվները» այցելություններ է կատարել ավելի քան 500 զորամասեր և սահմանմերձ բնակավայրերի կրթօջախներ: Ողջունելով ներկաներին ՀՀ պաշտպանության նախարարության վարչական համալիրում` Սեյրան Օհանյանը կարևորել է «Հայոց արծիվներ» հայրենասիրական կազմակերպության գործունեությունը և նշել, որ անցած տարիների ընթացքում նրանք ծավալուն աշխատանք են կատարել: «Անչափ կարևոր է, որ կազմակերպության կորիզը, որն այսօր գոյություն ունի, հնարավորություն է տալու, որպեսզի կազմակերպությունը նաև հաջորդ տարիներին ընդլայնվի և տարածվի հատկապես սահմանամերձ բնակավայրերում: Պաշտպանության նախարարության գործունեության կարևորագույն ուղղություններից մեկն էլ հայրենասիրական դաստիարակությունն է, որը մաս է կազմում յուրաքանչյուր պետության ռազմական ներուժի, բնակչության ազգային գաղափարական պատրաստականության, ներքին և արտաքին քաղաքականության, կրթության և գիտության, տնտեսության և ռազմական նպատակների: Եվ դա է պատճառը, որ նախկին ռազմական վերանայման ընթացքում և նաև մեր ռազմավարական փաստաթղթերի մեջ հայրենասիրական դաստիարակության բացակայությունը մենք նշել ենք որպես սպառնալիք Հայաստանի Հանրապետությանը»,-ասել է Սեյրան Օհանյանը և ընդգծել մի քանի խնդիրներ, որոնց վրա կազմակերպության ղեկավարներն առանձնակի ուշադրություն պետք է դարձնեն: Հանդիպման ավարտին «Հայոց արծիվներ» հայրենասիրական կազմակերպության նախագահ Խաչիկ Ասրյանը Սեյրան Օհանյանին պարգևատրել է «Հայոց արծիվներ» հուշամեդալով և խորհրդանշական հուշանվերով: Կազմակերպության աշխատանքներին աջակցելու համար Խ. Ասրյանը հուշանվերներ հանձնեց նաև ՀՀ ՊՆ աշխատակազմի ղեկավար Գառնիկ Հայրապետյանին ու ՀՀ ՊՆ տեղեկատվության և հասարակայնության հետ կապերի վարչության պետ Վարդան Ավետիսյանին: