Հայտնի են դարձել 2010 թ. «Լավագույն գիտական աշխատանք» ամենամյա մրցանակաբաշխության հաղթողների անունները: Տեղեկացնենք, որ մրցանակաբաշխությունն անցկացվում է 2008 թ.-ից ՀՀ Գիտությունների ազգային ակադեմիայի, Ռուսաստանի հայերի միության և Համաշխարհային հայկական կոնգրեսի կողմից: Մրցանակաբաշխությանը մասնակցել են մինչև 35 տարեկան երիտասարդ գիտնականներ: Հայտարարված 14 անվանակարգերում ներկայացվել են 37 գիտական հոդվածաշարներ, մենագրություններ: Ինչպես այսօր հայտնի է դարձել ԳԱԱ մամլո ծառայությունից, հաղթողներ են ճանաչվել 15 մասնակից: Նրանց թվում է նաև ՀՀ ՊՆ Ազգային ռազմավարական հետազոտությունների ինստիտուտի պետի խորհրդական, պատմական գիտությունների թեկնածու Վահրամ Տեր-Մաթևոսյանը` «Իսլամը Թուրքիայի հասարակական-քաղաքական կյանքում (1970-2001թթ.)» վերնագրով աշխատության համար, որը ներկայացված էր ՀՀ ՊՆ Ազգային ռազմավարական հետազոտությունների ինստիտուտի կողմից, «Արևելագիտություն» անվանակարգում: