Ս.թ. նոյեմբերի 6-ին եռօրյա պաշտոնական այցով Երևան ժամանեց Իրանի Իսլամական Հանրապետության պաշտպանության և զինված ուժերի աջակցման նախարար, գեներալ-մայոր Մոսթաֆա Մոհամմադ Նաջարի գլխավորած պատվիրակությունը:

Երևանի «Զվարթնոց» օդանավակայանում պատվիրակությանը դիմավորեցին ՀՀ պաշտպանության նախարար Մ.Հարությունյանը, պաշտպանության նախարարի տեղակալներ, գեներալ-լեյտենանտ Յու.Խաչատուրովը, գեներալ-լեյտենանտ Գ.Մելքոնյանը և Ա.Նազարյանը, ՀՀ ԶՈՒ գլխավոր շտաբի պետի առաջին տեղակալ, գեներալ-լեյտենանտ Է.Ապրիամովը և ՀՀ ԶՈՒ բարձրաստիճան սպայակազմի այլ ներկայացուցիչներ: Ս.թ. նոյեմբերի 7-ին պատվիրակությունը պաշտոնական հանդիպում ունեցավ ՀՀ պաշտպանության նախարար Մ.Հարությունյանի հետ: Հանդիպման սկզբում տեղի ունեցավ երկու երկների պաշտպանության նախարարների առանձնազրույց, այնուհետև պաշտոնական հանդիպումը շարունակվեց պատվիրակությունների կազմով: Հանդիպման ընթացքում կողմերը փաստեցին, որ վերջերս Հայաստանի Հանրապետության և Իրանի Իսլամական Հանրապետության նախագահների միջև կայացած հանդիպումը մեծապես կնպաստի երկու երկրների տնտեսական, մշակութային հարաբերությունների խորացմանը, նաև խթան կհանդիսանա ռազմական և ռազմատեխնիկական ոլորտներում համագործակցության համար: Ընդգծելով Հայաստանի և Իրանի միջև հարաբերությունների բարձր մակարդակը, կողմերը փոխշահավետ համագործակցություն զարգացնելու և փոխադարձ այցելություններն ակտիվացնելու վճռականություն հայտնեցին, ինչպես նաև տեսակետներ փոխանակեցին տարածաշրջանային ու միջազգային մի շարք խնդիրների վերաբերյալ, մասնավորապես նշելով, որ երկու երկրները մշակութային բավական նմանություններ ունեն և կարող են համատեղ իրագործել ծրագրեր նաև ռազմական, ռազմատեխնիկական բնագավառներում: Խոսելով ԼՂՀ հիմնախնդրի կարգավորման մասին, գեներալ-մայոր Մոսթաֆա Մոհամմադ Նաջարը նշեց, որ Իրանի դիրքորոշումն այդ հարցում անփոփոխ է, այն է` խնդրի լուծում խաղաղ կարգավորման ճանապարհով: Երկու երկրների ռազմական գերատեսչությունների ղեկավարները քննարկեցին նաև հայ-իրանական հարաբերությունների տարբեր բնագավառներին, համագործակցության ներկա վիճակին ու հեռանկարներին առնչվող մի շարք հարցեր: