ՀՀ պաշտպանության նախարարության և ՌԴ պաշտպանության նախարարության միջև ռազմական համագործակցության 2008թ. ծրագրի համաձայն ս.թ. հունիսի 16-ին ՀՀ պաշտպանության նախարար Սեյրան Օհանյանի գլխավորած պատվիրակությունը երկօրյա աշխատանքային այցով մեկնեց Ռուսաստանի Դաշնություն:

Այցի շրջանակներում ՀՀ պաշտպանության նախարարն այսօր հանդիպեց ՌԴ պաշտպանության նախարար Անատոլի Սերդյուկովի հետ: Հանդիպման ընթացքում կողմերը քննարկեցին տարածաշրջանային անվտանգությանն ու կայունությանն առնչվող մի շարք հարցեր, մտքեր փոխանակեցին երկու երկրների պաշտպանական ոլորտներում իրականացվող բարեփոխումների վերաբերյալ: Կողմերն անդրադարձան նաև հայ-ռուսական ռազմական, ռազմատեխնիկական և ռազմակրթական համագործակցության խնդիրներին, ինչպես նաև այս բնագավառներում ձեռքբերումներին: Երկու երկրների պաշտպանության նախարարների հանդիպում-առանձնազրույցին զուգահեռ տեղի ունեցավ նաև հանդիպում պատվիրակությունների կազմով, որի ընթացքում, նախկինում ձեռք բերված պայմանավորվածությունների շրջանակներում, քննարկվեցին երկկողմ ռազմական համագործակցության խնդիրներ: