Ս.թ. նոյեմբերի 25-ին Մայր Աթոռ Սուրբ Էջմիածնի Կոմիտասի անվան դահլիճում տեղի ունեցավ ՀՀ ՊՆ Ազգային ռազմավարական հետազոտությունների ինստիտուտի պետ-պաշտպանության նախարարի խորհրդական, ՀՀ ազգային անվտանգության ռազմավարության նախագծի Միջգերատեսչական մշակման գիտական ղեկավար, ք.գ.դ., գեներալ-մայոր Հայկ Քոթանջյանի հանդիպումը ճեմարանի տեսչության անդամների և սաների հետ:

Գեներալ-մայոր Հ.Քոթանջյանը համա­կարգչային լուսապատկերման միջոցով բովանդակալից կերպով ներկայացրեց ՀՀ ազգային անվտան­գության ռազմավարության մշակման ամբողջ գործընթացը: Հայաստան–ՆԱՏՕ «Անհատական գործընկերության գործողությունների ծրագրի» արդյունավետ իրագործ­ման շրջանակներում, Հայաստանի անվտանգության ռազմավարության մշակումը երկրի պաշտպանական համակարգի բարեփոխմանն ու կատարելագործմանն ուղղված էական քայլ էր, որի նախաձեռնողն ու անմիջական ղեկավարը ժամանակին` ՀՀ Ազգային անվտանգության խորհրդի քարտուղար, պաշտպանության նախարար, ներկայումս` ՀՀ Նախագահ Սերժ Սարգսյանն էր: «Հայաստանի Հանրապետության ազգային անվտանգության ռազմավարու­թյան ուղենիշները» վերնագրով նրա զեկուցումը Մոսկվայում, Վաշինգտոնում և Բրյուսելում կայացած մեթոդաբանական փորձա­քննության արդյունքներով երաշխավորվեց որպես ազգային անվտանգության ռազմավարության միջգերա­տեսչական մշակման հիմք: Ստեղծվեց Միջգերա­տեսչական հանձնաժողով, որը նախագահում էր Սերժ Սարգսյանը: Հանձնաժողովը, օգտագործելով ԱՄՆ-ի և Ռուսաստանի անվտան­գության դպրոցների առաջա­դիմական մեթոդաբանական նվաճումները, մշակեց Հայաստանի անվտանգ ու կայուն զար­գացման` իր բովանդակությամբ ազգային, ռազմա­վարությունը: Դոկտոր Քոթանջյանն իր խոսքում մասնավորապես նշեց, որ Միջգերատեսչական մշակման արդյունքն հաջողու­թյամբ փորձաքննության ենթարկվեց ԱՄՆ-ի Պաշտպանական համալսարանի Ռազմական քոլեջի ակադեմիական կոմիտեի, ՆԱՏՕ-ի արտաքին խորհրդատ­վական խմբի և Ռուսաստանի նախագահին առընթեր Պետական ծառայության ռու­սաստանյան ակադեմիայի կողմից, ինչպես նաև մեր հանրապետությունում պետ­համալսարանի գիտխորհրդի և ԳԱԱ-ի նախագահության նիստերում ու ԱԺ-ում կայացած քննարկումներում: Փորձագիտական այս ձևաչափի ընտրությունը հնարավորություն տվեց արդյունավետ կերպով օգտագործել տարբեր երկրների փորձն ու ապահովել ռուսական և ամերիկյան մեթոդաբա­նական համատեղելիությունը: Ներկայացնելով Ազգային ռազմավարական հետազոտությունների ինստի­տուտի ստեղծման ու կայացման պատմությունը` գեներալ-մայոր Քոթանջյանը նշեց, որ ԱՄՆ-ում իր ստաժավորման ծրագրում ժամանակին ներառվեց Ազգային ռազմավարական հետազոտությունների ինստիտուտի նախագծի մշակումը ԱՄՆ-ի պաշտպա­նական համալսարանի Ազգային ռազմավարական հետազոտությունների մայր ինստիտուտում: Նախագիծն հաջողութ­յամբ իրագործվեց: Հետագայում ինստիտուտը կատարեց Միջգերատեսչական հանձնաժողովի քար­տու­ղարության դերը: Իր ելույթի ընթացքում Հայկ Քոթանջյանը գոհունակությամբ շեշտեց նաև Մայր Աթոռի սերտ համագործակցությունը Միջգերատեսչական հանձնաժողովի հետ, ինչը նպաստեց հոգևոր անվտանգության հարցի լիարժեք քննարկմանն ու արծարծմանը փաստա­թղթում: Նա նաև կարևորեց դահլիճում ներկա գտնվող ապագա հոգևորականների` որպես հոգևոր սպասավորների, պատասխանատու դերը նաև բանակում: Հանդիպ­ման վերջում հնչեցին հարցեր ռազմավարության մշակման մեթոդաբանութ­յան ու հոգևոր անվտանգության խնդիրների վերաբերյալ: Ճեմարանի սաները նշեցին, որ կարողա­ցան մանրա­մասն պատկերա­ցում կազմել մեր երկրի պետական կարևորության փաստաթղթի բովանդա­կության վերաբերյալ և ստանալ իրենց հուզող որոշ հարցերի պատասխանները: ՀՀ պաշտպանության նախարար Սեյրան Օհանյանի ղեկավարությամբ ներկայումս ընթացող պաշտպանական բարեփոխումների համատեքստում կարևորելով բանակ-եկեղեցի սերտ կապը` մասնակիցները հույս հայտնեցին, որ զինվորականների հետ այսօրինակ հանդիպումները կկրեն պարբերական բնույթ: