Երկօրյա աշխատանքային այցով Ռուսաստանի Դաշնությունում գտնվող ՀՀ պաշտպանության նախարար Սեյրան Օհանյանի գլխավորած պատվիրակությունը ս.թ. հունիսի 17-ին հանդիպեց Հավաքական անվտանգության պայմանագրի կազմակերպության գլխավոր քարտուղար Նիկոլայ Բորդյուժայի և ՀԱՊԿ միացյալ շտաբի ղեկավարության հետ:

Հանդիպման ընթացքում կողմերը քննարկեցին հավաքական անվտանգության համակարգի զարգացմանը, ՀԱՊԿ շրջանակներում խաղաղապահ գործունեությանը, ռազմական, ռազմատեխնիկական, ռազմաուսումնական և ռազմատնտեսական համագործակցությանը նպաստող հարցեր: Քննարկվեցին նաև ՀԱՊԿ անդամ պետությունների պաշտպանության նախարարների կայանալիք հերթական նիստի օրակարգային հարցեր. ի դեպ, այս անգամ խորհրդի նախագահությունը ստանձնելու է Հայաստանը: Հանդիպմանը կարևորվեց հատկապես «Ռուբեժ 2008» հրամանատարաշտաբային զորավարժության անցկացումը, ինչպես նաև քննարկվեցին կազմակերպչական որոշ հարցեր: Կողմերն անդրադարձան նաև Միացյալ ռազմական համակարգերի ստեղծմանն ու գործունեությանն առնչվող խնդիրների: