Շարունակվում է ռազմաուսումնական հաստատությունների շրջանավարտների` ըստ ծառայության վայրի բաշխման գործընթացը:

Ս.թ. հուլիսի 3-ին, ՀՀ պաշտպանության նախարարության մեծ դահլիճում տեղի ունեցավ Երևանի Մ.Հերացու անվան պետական բժշկական համալսարանի ռազմաբժշկական ֆակուլտետի և օտարերկրյա ռազմաուսումնական հաստատությունների շրջանավարտների` վիճակահանությամբ բաշխումը: Արարողությանը ներկա էր նաև ՀՀ պաշտպանության նախարար Սեյրան Օհանյանը, որը ողջունեց նորաթուխ սպաներին` իր խոսքում մասնավորապես ասելով. «Սիրելի լեյտենանտներ, Շնորհավորում եմ ձեզ` ռազմաուսումնական հաստատություններ ավարտելու կապակցությամբ: Այս միջոցառումը ևս ՀՀ զինված ուժերում իրականացվող բարեփոխումների գործընթացներից է, որը նպաստելու է պաշտպանության նախարարության համակարգում կադրային ճիշտ քաղաքականության վարմանը և անաչառությանը: Ավարտելով ռազմաուսումնական հաստատությունները, դուք ձեռք եք բերել տեսական գիտելիքներ, որոնք կիրառելու եք մեր զինված ուժերում ծառայության ընթացքում: Տարբեր առիթներով բազմիցս նշել եմ, որ սպայի մասնագիտությունը հերոսական մասնագիտություն է. մենք երազել ենք ունենալ ազատություն, անկախություն` այդպիսով նաև մեր ազգային բանակը: Սրանք արժեքներ են, որոնք պետք է պահպանել` վերագնահատելով այն, ինչ ձեռք ենք բերել` քաղելով առաջատարների փորձը: Ծառայության ընթացքում առնչվելով տարբեր խնդիրների` պետք է տեսնեք և վերհանեք լավը, զարգացնեք այն` զուգորդելով դրանք ձեր գիտելիքների հետ: Չհամակերպվեք նկատված թերությունների, բացթողումների հետ. պետք է պայքարել դրանց դեմ. պայքարելով է սպան հմտություն ձեռք բերում: Պետք է կիրառեք ձեր գիտելիքները և զարգացնեք դրանք. հետագայում ռազմական ակադեմիաներում սովորելու հնարավորություն է տրվելու միայն բարձր գիտելիքներ և հեռանկար ունեցող, բարեխիղճ զինծառայողներին: Դուք եք, որ լրացնելու եք մեր հայ զորավարների համաստեղությունը, դուք եք, որ փոխարինելու եք մեզ: Մաղթում եմ ձեզ հաջողություն և փայլուն զինվորական կարիերա: Զինծառայողների հետ առնչվելիս եղեք պահանջկոտ, համարձակ, բայց բարոյական. առավելագույն համբավ ունեցել են այն հրամանատարները, ովքեր առավելագույնս մոտ են կանգնած եղել ժողովրդին, իրենց ենթականերին: Եղեք ժողովրդական»: Ս.Օհանյանի ողջույնի խոսքից հետո անմիջապես մեկնարկեց վիճակահանության գործընթացը, որի ժամանակ, ի դեպ գրանցվեց միակ բացառությունը. նախարարի ցուցումով երկու շրջանավարտներ ամուսինների հնարավորություն ընձեռվեց ծառայել միևնույն զորամասում: Այնուհետև նախարարը հանդիպեց լրագրողներին և պատասխանեց վերջիններիս հարցերին: Լրագրող- Պարոն նախարար, Երևանի Մ.Հերացու անվան պետական բժշկական համալսարանի ռազմաբժշկական ֆակուլտետում նոր բաժիններ բացվելո՞ւ են: Ս.Օհանյան- Ոչ: Լրագրող – Իսկ ի՞նչ կասեք Բիշքեկ կատարած Ձեր աշխատանքային այցի առնչությամբ: Ս.Օհանյան- Բիշքեկում, ինչպես արդեն գիտեք, մասնակցեցի ԱՊՀ անդամ-պետությունների պաշտպանության նախարարների խորհրդի հերթական նիստին, որի ընթացքում հիմնականում հաշվետվություններ էին` կատարված աշխատանքների վերաբերյալ: Ապա քննարկվեցին և ստորագրվեցին ռազմական համագործակցության բնագավառի վերաբերյալ մի շարք փաստաթղթեր: Այցի ընթացքում հանդիպում եղավ նաև Ադրբեջանի Հանրապետության պաշտպանության նախարարի հետ. քննարկեցինք շփման գոտում հրադադարի ռեժիմի խախտման դեպքերի նվազեցմանն առնչվող, ինչպես նաև անհայտ կորած ազատամարտիկների ճակատագրի վերաբերյալ խնդիրներ: Ի դեպ, Ադրբեջանում գտնվող հայ գերիների առնչությամբ Ադրբեջանի Հանրապետության պաշտպանության նախարարը նշեց, որ համապատասխան աշխատանքներ իրականացնելուց հետո հնարավոր կլինի նրանց փոխանակումը կամ վերադարձը: Իսկ Չինարի գյուղում տեղի ունեցած դժբախտ դեպքերի առնչությամբ Ս.Օհանյանը նշեց, որ հայկական զինված ուժերի կողմից իրականացված միջոցառումների շնորհիվ ադրբեջանական կողմում էլ կան զոհեր: