Ողջունելով հյուրին, ՀՀ պաշտպանության նախարարը շնորհակալություն հայտնեց ԱՄՆ պետքարտուղարությանը` հայ-ամերիկյան պաշտպանական համագործակցության զարգացման գործում ցուցաբերած աջակցության համար: Պարոն Ռուբինը ողջունեց ՀՀ պաշտպանական ոլորտում իրականացվող բարեփոխումների ընթացքը և տեղեկացրեց, որ ԱՄՆ կողմը շարունակելու է այս ուղղությամբ իր աջակցությունը տրամադրել Հայաստանին: ԱՄՆ պետքարտուղարության պաշտոնյան նշեց, որ ամերիկյան կողմը բարձր է գնահատում Հայաստանի ջանքերը միջազգային անվտանգության ապահովման գործում, մասնավորապես Աֆղանստանում ՆԱՏՕ-ի կողմից իրականացվող Միջազգային անվտանգության աջակցման ուժերի կազմում հայկական զորախմբի կողմից իրականացվող առաքելությունը: Հանդիպման ընթացքում քննարկվեցին պաշտպանական ոլորտում հայ-ամերիկյան երկկողմ համագործակցությանը, ինչպես նաև տարածաշրջանային անվտանգությանն առնչվող այլ հարցեր: